Assalamualaikum Wr. Wb.

Sak sampunipun poro santri perso langsung dawuh wasiatipun Hadrotus Syekh Simbah K. Arwani Amin. Kawulo perlu ngajak dateng badan kulo piyambak, ugi dumateng sedoyo santri-santri.

Kulo ajak andere‛aken tindak lan dawuhipun menurut kemampuanipun, antawis tindak‛ipun Hadrotus Syekh ingkang menonjol inggih puniko ngutamaaken khidmah dateng Al-Qur‛an, mahos piyambak utawi mahos dipun semak tiyang-tiyang sanes, utawi mucal santri-santri tur sanget setiti, mboten kesusu dipun inggahaken  selagi dereng fasih saestu.

Pramilo wekas kulo dumateng poro santri menawi mucal santri supados ingkang setiti. Ampun ngantos enggal-enggal dipun inggahaken namung nuruti santri utawi namung sakperlu enggal saged ngawontenaken syukuran khataman Al-Qur‛an.

Ampun ngantos menawi dipun suwuni mahos setunggal khataman inggih saestu ngestoaken. Soho mahosipun ingkang tajwid (sedoyo huruf-hurufipun Al-Qur‛an dipun wahos cetho/ jelas. Mboten pareng guguraken/ nyamaraken utawi ngrubah huruf, lan sedoyo wahosan hususipun Mad Lazim, Mad Wajib, Mad Jaiz kedah kewahos panjang ampun ngantos ngulina‛ake nyampar utowo serampangan, lan kados Mad Thobi‛i lan Mad Aridhi ampun ngantos kirang saking setunggal alif)

Kedah dipun mangertosi bilih tiyang mahos Al-Qur‛an meniko ingkang asli tartil. Artosipun fasih tur arang-arang. Namung syara‛  marengaken mahos Al-qur‛an dipun bagi dados tigang tingkatan :

1. Tartil (Fasih, Arang-Arang)
2. Tadwir (Fasih Sedengan)
3. Hadr (Fasih Cepet)

Namung emuto cepetipun mahos meniko terbatas (Kedah Tajwid) kados ingkang sampun kulo aturaken ing nginggil kasebat. Emut ingkang dipun wahos meniko KALAMULLOH AL-QUR‛AN . Mboten enten rukhshoh/ kemurahan Al-Qur‛an dipun wahos kados sanesipun Al-Qur‛an.

كما قال تعالى : ورتّل القرأن ترتيلا

وقال محمّد ابن الجزررى فى كتابه : والأخذ بالتّجويد حتم لازم # من لم يجوّد القرأن اثم

Pramilo sedoyo poro santri kulo suwun ndereaken dawuh-dawuh meniko. Ampun ngantos kepincut tiyang-tiyang ingkang mahos 30 Juz saged khatam 6 jam, 7 jam, 8  jam, 9 jam. Sak titahipun mawon. Dene menawi ingkang kagungan kerso pengen cepet-cepet wekdalipun prayugi dipun cicil kawahos sebagian wonten griyanipun pyambak dipun tasihaken 15 juz menopo 10 juz menopo 5 juz. Menawi nyuwunipun wekdal dzuhur khatam meniko mahosipun 10 juz dipun milahi jam 6 utowo jam 06:30 sak kersanipun saged sae wahosanipun, Ngoten sak terasipun.

Suwunan kulo ingkang akhir, sedoyo Santri Alumni/ Mutakhorijin, saben -saben wulan Dzulhijjah tanggal 13 kasuwun hadir serto ndereaken mudarosah sinahoso mboten mampu mahos. Sebab taseh katah ingkang lepat utawi supe, kersanipun shilahipun guru kalian santri, soho antara santri ingkang rumiyin kalian santri ingkang kantun saged lestari Ila Yaumil Qiyamah.

Kawulo tansah mujiaken nyuwun dumateng ALLAH SWT mugi-mugi poro santri sedoyo keparingan ilmu ingkang manfaat barokah Fiddunya Wal Akhiroh lan tampi ridhonipun ALLAH  Amin Ya Robbal Alamin.

Wassalamu’alaikum, Wr. Wb.